sábado, 19 de mayo de 2007

Las caballerías de casa

M’alcuerdo que por allora, cuando lo macho bayo, tamién heba yo un caballo royo, veroyo él, ¡ah... que lo cudiaba muito! Lo macho ibiera enamoráu d’el, porque cuando lo me levaba a carriar u lo que fuese, se quedaba en la cuadra patiando y arreando relinchitos. Se me feban güena honra los dos pa labrar chuntos. Más enta deban m’habié que desfer de lo macho, aproveitando que facieron un feria en Echo... Me parez que unas siete mil pecetas me dieron. Total ya yera viello y yo ya no iba enta la madera...

Otra vez, hébanos una yegua que la m’heban dáu de lechala los de Bisaltico (la casa mía, ¡cuéntate... qué dote!) que la puyé una temporada de pasto enta lo Campanil. Con tan güen acierto que, en ixe mismo puerto bi-heba un burro, de Braviz. No podié por menos que pasar lo qu’heba a pasar, anque si lo me cuentan antis no lo m’habría criíu.
Lo dichoso burro, aproveitando que la yegua ibiera calién (en celo), no podié por más que montarla. Y mira que yera más bien chiquet, ¿cómo diaples lo faría? Lo caso ye que, la yegua baxé preñada y amanecié a parir una potranca, no muy gran, pero guita, que no bi-heba trazas de ferse con ella... Si m’escudio, una vez s’en quereba salir de la cuadra por la finestra... ¡cuasi s’afoga entre los barotes!

Aproveité que los de Concheta heban a ir ta la feria de Chaca a vender un par de caballos bien veroyos, y con ellos m’en fue. Lo día de plegar me daban cuatro mil pecetas, que no me paicieron muito, la verdá... A l’otro l’día, ¡m’en dieron tres mil! Y habié que pillarlas, no me iba a tornar enta casa con lo diaple d’animal... Conque mira qué negocios...

A todo ixo... tamién los de Concheta habieron otri contornillo. Los que lis merqueron los caballos yeran unos tratáns valencianos, que por cierto ya se yo pa qué quereban las caballerías. Cuando estié en la mili, me leveron enta Gandía, cuando la guerra, y allí vié yo cómo levaban reatas de carros plenos de naranjas enta lo puerto, con caballerías bien acotraciadas; prexino que las quererían pa ixe menester...

Lo caso ye que ixos tratáns heban a estar algo trapaceros, porque li demanderon a Concheta que, sigún las costumbres qu’ellos empleaban, lo caucarré pa la guía de transporte enta Valencia l’heba que apoquinar él. No se dixé engatusar y clamé a los civiles, con tan güena suerte que bi-heba un cabo que yera aragonés y lis facié entender que, en la nuestra tierra, ixa costumbre no valeba. Concheta heba sacáu la guía dende Echo enta Chaca, y a ellos lis tocaba sacarla pa poderse levar los abrios enta Valencia. I si no... que no los hesen mercáu.

1 comentario:

O mensachero zereño dijo...

Se que isto no cal meter-lo aqui pero no trobo una adreza de correu.

Ola Remeros Curtos que tal plantas? ta lo biernes benien o diya 28 de setiembre, somos parando una trobada de bloggers en aragonés. S'en fará en Zaragoza capital con l'ochetibo de chuntarnos, charrar un ratet y fer unas bieras. D'ista trobada s'aspera tamién que salga bel proyeuto conchunto d'aquers bloggers que s'animen. Si te cuaca a ideya y quiers benir-ie, dentra en http://trobada.blogdns.net y trobarás mas informazión.

Un fortal abrazo, Mensachero.